Ekoloji yoxlamaların nəticələri
Ekologiya və Təbii Sərvətlər Nazirliyi 16-31 yanvar arası apardığı yoxlamaların nəticələrini açıqlayıb. Rəsmi məlumatda qeyd olunur ki, atmosfer havasının, su və torpaq ehtiyatlarının, yerin təkinin, fauna və floranın mühafizəsi, məişət və istehsalat tullantılarının yerləşdirilməsi sahəsində qanun pozuntularına görə 152 akt və protokol tərtib olunub, nöqsanların aradan qaldırılması üçün 15 müddətli məcburi göstəriş verilib.
Ümumilikdə 39 iş üzrə 46700 manat məbləğində inzibati cərimə tətbiq edilib, ətraf mühitə dəymiş ziyana görə 12 iş üzrə 11990,1 manat məbləğində iddia qaldırılıb, hüquqi və fiziki şəxslərə qarşı 583 iş üzrə 47494,34 manat məbləğində ödəmə tətbiq olunub.
Tədbir görülməsi üçün hüquq mühafizə orqanlarına 39, icra qurumlarına 32, məhkəmələrə isə 1 iş göndərilib.
