Xarici media əhli Cocuq Mərcanlını ziyarət edib
Azərbaycanda akkreditə olunmuş bir qrup xarici jurnalist fevralın 7-də Cəbrayıl rayonunun Cocuq Mərcanlı kəndinə səfər edib. “Associated Press”, “Reuters”, “RİA Novosti”, “İnterfax”, “Sputnik”, “Anadolu”, “İhlas”, EFE agentliklərinin, TRT telekanalının, İranın Azərbaycanda fəaliyyət göstərən media qurumlarının və digər KİV orqanlarının əməkdaşlarının qatıldığı ziyarətin təşkilatçıları Xarici İşlər Nazirliyi və Qaçqın və Məcburi Köçkünlərin İşləri üzrə Dövlət Komitəsidir.
Novator.az bildirir ki, Cocuq Mərcanlı Cəbrayıl rayonunun işğaldan azad edilmiş yeganə yaşayış məntəqəsidir. 1993-cü ilin oktyabrında Ermənistan silahlı birləşmələrinin işğal etdiyi kənd 1994-cü il yanvarın 5-də Azərbaycan Ordusunun keçirdiyi Horadiz əməliyyatı zamanı Füzuli rayonunun 22 yaşayış məntəqəsi ilə birgə azad olunub.
2016-cı ilin aprel ayındakı əks-hücumdan sonra Azərbaycan Ordusu ətraf ərazilərə nəzarət edir və Cocuq Mərcanlı kəndində insanların təhlükəsiz yaşaması mümkün olub, dinc əhalinin qayıtması üçün əsaslı yenidənqurma işlərinin başlanmasına şərait yaranıb.
Ötən ay prezident İlham Əliyev Cocuq Mərcanlı kəndinin bərpasına sərəncam verib. Kənddə 50 fərdi yaşayış evinin, məktəb binasının və müvafiq infrastrukturun tikintisi üçün Qaçqınların və Məcburi Köçkünlərin İşləri üzrə Dövlət Komitəsinə ilkin olaraq 4 milyon manat ayrılıb.
