Meşə reydləri cəzalar gətirdi
Ekologiya və Təbii Sərvətlər Nazirliyi 2016-cı ilin dekabr və 2017-ci ilin yanvar aylarında Masallı, Zaqatala və Qusar meşələrində mühafizə vəziyyətini araşdırıb.
Nazirliyin rəsmi məlumatında qeyd olunur ki, araşdırma zamanı meşələrin qorunub mühafizə olunmasını qeyri-qənaətbəxş təşkil edərək əmək müqaviləsi üzrə öhdəliklərini yerinə yetirmədiklərinə, xidməti ərazilərində ekoloji qanunvericiliyin tələblərinin pozulmasına görə Masallı Meşə Mühafizəsi və Bərpası Müəssisəsinin direktoru, müəssisənin Qəriblər meşəbəyliyinin meşəbəyisi və 5 meşə gözətçisi tutduqları vəzifədən azad edilib, digər cavabdeh meşə mühafizə işçiləri barəsində intizam tənbehi tədbirləri görülüb.
Zaqatala Meşə Mühafizəsi və Bərpası Müəssisəsinin Car meşəbəyliyinin meşəbəyisi və meşəbəyi köməkçisi, həmçinin 6 meşə gözətçisi işdən azad olunub. Müəssisənin direktoru və digər cavabdeh meşə mühafizə işçiləri barəsində müxtəlif intizam tənbeh tədbirləri görülüb.
Qusar Meşə Mühafizəsi və Bərpası Müəssisəsində də cavabdeh şəxslər barəsində qanuna müvafiq intizam tənbehi tədbirləri görülüb. Müəssisənin direktoru, baş meşəbəyi, meşəbəyi köməkçisi və 4 gözətçi tutduqları vəzifədən azad olunub.
