Bağlanan banklara görə nə qədər təzminat verilib?
Əmanətlərin Sığortalanması Fondu (ƏSF) yeni hesabat yayıb. Hesabata görə, “Parabank” ASC-nin qorunan əmanətçilərinə 43 milyon 137 min manat (ümumi kompensasiya öhdəliyinin 98,3 faizi), “Zaminbank” ASC-nin əmanətçilərinə 53 milyon 389 min manat (öhdəliyin 73 faizi), “Kredobank” ASC-nin əmanətçilərinə 27 milyon 770 min manat (öhdəliyin 99,5 faizi), “Dekabank” ASC-nin əmanətçilərinə isə 3 milyon 86 min manatdan (öhdəliyin 98,7 faizi) artıq kompensasiya ödənilib.
ƏSF bildirir ki, “Atrabank” ASC-nin qorunan əmanətçiləri 14 milyon 271 min manat (öhdəliyin 98,1 faizi), “Qafqaz İnkişaf Bankı” ASC-nin əmanətçiləri 1 milyon 974 min manatdan (öhdəliyin 94,4 faizi) artıq kompensasiya alıb.
Sığorta hadisəsi baş vermiş “Bank of Azerbaijan” ASC-nin qorunan əmanətçilərinə 24 milyon 161 min (öhdəliyin 97 faizi), “Gəncəbank” ASC-nin əmanətçilərinə 976 min manat (öhdəliyin 94 faizi), “Texnikabank” ASC-nin əmanətçilərinə isə 120 milyon 428 min manatdan artıq (öhdəliyin 98,2 faizi) kompensasiya verilib.
“Bank Standard” qorunan əmanətçilərinə 434 milyon 991 min manatdan artıq kompensasiya ödənilib. Bu, ümumi kompensasiya öhdəliyinin 99 faizidir.
Ləğv prosesində olan “Bank of Azerbaijan” ASC-nin qorunan əmanətçilərinə kompensasiyaların ödənilməsi üçün ərizələrin qəbulu yanvarın 27-də, “Gəncəbank” ASC-nin qorunan əmanətçilərinə kompensasiyaların ödənilməsi üçün ərizələrin qəbulu fevralın 4-də başa çatıb.
