Tələbə köçürülməsində yeni qayda
Təhsil Nazirliyi fevralın 6-dan tələbələrin ölkə daxilində və xaricdə yerləşən ali təhsil müəssisələrindən köçürülməsi, yaxud bir ixtisasdan digərinə dəyişdirilməsi məqsədilə elektron sənəd qəbuluna start verib. Novator.az-ın məlumatına görə, nazirlik bildirir ki, bu tədris ilindən tələbələrin köçürülməsində yenilik tətbiq olunub. Fevralın 7-dən orta ixtisas təhsili müəssisələrinin tələbələri də Transfer.edu.az elektron portalı vasitəsilə köçürülmək üçün müraciət edə bilərlər.
Sənədlərin elektron qəbulu fevralın 14-dək davam edəcək.
Təhsil Nazirliyi və Dövlət İmtahan Mərkəzinin birgə yaratdığı Transfer.edu.az portalına müraciət edən şəxslər köçürülmək istədiyi təhsil müəssisəsini seçə, tələb olunan məlumatları daxil etməklə köçürülmə meyarlarına uyğun gəlib-gəlmədiyini müəyyən edə bilərlər.
Tələbələrin köçürülməsi qış və yay tətili dövründə həyata keçirilir. Dövlət İmtahan Mərkəzinin keçirdiyi qəbul imtahanlarında tələbənin topladığı bal qəbul olunduğu ildə köçürülmək istədiyi ali təhsil müəssisəsində müvafiq ixtisas üzrə minimal keçid balından az olmamalıdır. Həmçinin tələbənin qəbul olunduğu və köçürülmək istədiyi ixtisaslar Dövlət İmtahan Mərkəzinin müəyyən etdiyi eyni ixtisas qrupu daxilində olmalıdır.
Xarici ölkələrin akkreditə olunmayan ali təhsil müəssisələri tələbələrinin Azərbaycanın ali təhsil müəssisələrinə köçürülməsinə yol verilmir. Tələbənin təhsil aldığı ali təhsil müəssisəsinin dünyanın ən yaxşı ali təhsil müəssisələrinin reytinq siyahısında olması da nəzərə alınan göstəricilər sırasındadır. Əcnəbilərin və vətəndaşlığı olmayan şəxslərin elektron köçürülmədə iştirak etmək hüququ yoxdur.
Nazirlik bildirir ki, 2016-cı ilin avqust ayında istifadəyə verilən Transfer.edu.az portalına ümumi müraciət edənlərin sayı 241 nəfər olub, 83 nəfərə müsbət cavab verilib.
