Şəhid əsgərlə vida mərasimi keçirilib
Şəhid əsgər Qurbanov Çingiz Salman oğlunun meyiti Azərbaycana qaytarılıb.
Novator.az xatırladır ki, ötən il dekabrın 29-da Ermənistan Silahlı Qüvvələrinin kəşfiyyat qrupu Azərbaycan-Ermənistan dövlət sərhədini pozmağa cəhd göstərib. Döyüş toqquşması zamanı qarşı tərəfin bir zabiti, iki əsgəri öldürülüb, Azərbaycan Silahlı Qüvvələrinin əsgəri Çingiz Qurbanov şəhid olub. Həmin gündən onun meyiti ermənilərdə idi.
Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası bildirir ki, Çingiz Qurbanovun meyiti beynəlxalq təşkilatlarla aparılmış müntəzəm tədbirlər nəticəsində fevralın 5-i Qazax rayonunun Bala Cəfərli kəndi istiqamətində qarşı tərəfdən alınıb. Bu qurumun və Müdafiə Nazirliyinin həyata keçirdiyi prosesdə Beynəlxalq Qızıl Xaç Komitəsi ilə ATƏT-in fəaliyyətdə olan sədrinin şəxsi nümayəndəsi səfir Anjey Kasprşikin vasitəçilik etdiyi bildirilir.
Həmin gün əsgərin cənazəsi fəxri qarovulun müşayiəti ilə Bakıya yola salınıb. Fevralın 6-sı Müdafiə Nazirliyinin Təlim və Tədris Mərkəzində Çingiz Qurbanovla vida mərasimi keçirilib. APA-nın məlumatına görə, vida mərasimində müdafiə general-polkovnik Zakir Həsənov, Silahlı Qüvvələrin Baş Qərargah rəisi Nəcməddin Sadıqov, hərbi prokuror Xanlar Vəliyev, Dövlət Təhlükəsizliyi Xidmətinin rəisi Mədət Quliyev, şəhidin ailə üzvləri, dövlət və hökumət nümayəndələri, hərbçilər iştirak edib.
Şəhid əsgər doğulduğu Qusar rayonunda dəfn olunacaq.
