Prezident Belçikadadır
Prezident İlham Əliyev fevralın 5-də Avropa İttifaqı Şurasının prezidenti Donald Tuskun dəvəti ilə Belçika Krallığına səfərə gedib. Brüsselin beynəlxalq hava limanında qarşılanan dövlət başçısı həmin gün Vaterlo şəhərində şairə Xurşidbanu Natəvanın abidəsini ziyarət edib. Mərasimə Vaterlo şəhərinin meri Floran Röter də qatılıb.
Ötən il fevralın 18-də açılışı olan abidənin ucaldılmasına Heydər Əliyev Fondu dəstək verib. Şəhərin mərkəzi parkında ucaldılmış abidəni xalq rəssamı Tahir Salahovun rəhbərliyi ilə heykəltəraş İmran Mehdiyev hazırlayıb. Abidənin özülündə Xurşidbanu Natəvanın Qarabağ şahzadəsi olması barədə məlumat var.
AZƏRTAC xəbər verir ki, sonra İlham Əliyev Brüsseldə Avropa Şurası Parlament Assambleyasının sabiq prezidenti, Niderland-Azərbaycan dostluq qrupunun sədri Rene Van der Lindenlə görüşüb.
