Əfqanıstanın qanlı statistikası
Ötən il Əfqanıstanda silahlı münaqişədə ölənlərin və yaralananların sayı 11 min 500 nəfər olub, bu da 2009-cu ildən bəri ən yüksək göstəricidir. Novator.az-ın məlumatına görə, BMT-nin Əfqanıstan missiyasının fevralın 6-da yaydığı hesabatda belə deyilir.
Hesabata əsasən, 2016-cı ildə münaqişə nəticəsində Əfqanıstanda 3 min 498 nəfər dinc sakin həlak olub, 7 min 920 nəfər yaralanıb. 2015-ci illə müqayisədə həlak olanların sayı 2% azalıb, yaralananların sayı 6% çoxalıb.
Missiyanın açıqlamasında qeyd olunur ki, Əfqanıstanda münaqişə nəticəsində ziyan çəkən uşaqların sayı ötən il 24% artaraq 3 min 500 nəfərə çatıb. Uşaqların təxminən yarısı hökumət qüvvələri ilə silahlı birləşmələr arasında toqquşmalardan, qalanı isə bomba və digər silah-sursatın partlamasından zərər çəkib.
Məruzəyə görə, hədəfi dini məbədlər olan terror aktlarından zərər çəkən dinc sakinlərin sayı 2016-cı ildə 6 dəfə artıb.
