Brüsseldə yeni görüşlər
Fevralın 6-sı Brüsseldə Azərbaycan prezidenti İlham Əliyevin Belçika kralı Filiplə təkbətək görüşü olub.
AZƏRTAC xəbər verir ki, daha əvvəl İlham Əliyev Avropa İttifaqının xarici məsələlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Federika Mogerini ilə işçi səhər yeməyində bir araya gəlib.
Azərbaycanla əməkdaşlığın Avropa İttifaqı üçün böyük önəm daşıdığını vurğulayan Federika Mogerini Cənub Qaz Dəhlizi layihəsinin Avropa İttifaqı üçün böyük əhəmiyyətə malik olduğunu vurğulayıb. Federika Mogerini layihənin Avropanın enerji təhlükəsizliyinin təmin olunmasında və qaz təchizatının şaxələndirilməsində mühüm rolunu qeyd edib və Avropa İttifaqının layihənin reallaşmasına bundan sonra da dəstək verəcəyini deyib.
Prezident İlham Əliyev Avropa İttifaqı ilə əməkdaşlığın genişləndirilməsinin həm Azərbaycan, həm də region üçün yaxşı mesaj olduğunu vurğulayıb, Avropa İttifaqının Azərbaycan üçün etibarlı dost və tərəfdaş olduğunu qeyd edib.
Söhbət zamanı Azərbaycan-Avropa İttifaqı əlaqələrinin bundan sonra da uğurla inkişaf edəcəyinə əminlik ifadə olunub, əməkdaşlığın perspektivləri, energetika, nəqliyyat, təhlükəsizlik, regional və qarşılıqlı maraq doğuran digər məsələlər ətrafında fikir mübadiləsi aparılıb.
İlham Əliyev Avropa Komissiyasının enerji birliyi üzrə vitse-prezidenti Maroş Şevçoviçlə də görüşüb.
