Angela Merkel rəsmən namizəd oldu
Fevralın 6-da Xristian-Demokrat İttifaqı Angela Merkeli Almaniya kansleri postuna rəsmən namizəd göstərib.
Novator.az bildirir ki, Almaniyada kansler postunu parlament seçkisində qalib gələn partiyanın təklif etdiyi şəxs tutur. Parlament seçkisi sentyabrda keçiriləcək və bundan sonra yeni hökumət formalaşacaq. Seçkidə qalib gəlsə, Angela Merkel dördüncü dəfə hökumət başçısı postunu tuta bilər.
Angela Merkel 1954-cü ildə Almaniya Federativ Respublikasının Hamburq şəhərində doğulub. Üç yaşında olarkən valideynləri ilə Almaniya Demokratik Respublikasına köçüb.
1978-ci ildə Leypsiq Universitetinin fizika fakültəsini bitirən Angela Merkel uzun müddət elmi fəaliyyətlə məşğul olub, 1990-cı ildə Almaniya birləşəndən sonra siyasətə qoşulub. O, əvvəl Xristian Demokrat İttifaqının üzvü, sonra isə parlamentin bu partiyadan deputatı olub. 1991-ci ildə Xristian Demokrat İttifaqı sədrinin müavini, 1998-ci ildə baş katib, 2000-ci ildə sədr seçilib.
Angela Merkel 1991-1994-cü illərdə qadınlar və gənclər naziri, 1994-1998-ci illərdə isə ətraf mühit və təbiətin mühafizəsi naziri postlarını tutub. O, 2005-ci ildən Almaniya kansleridir.
