Mülki aviasiya sahəsində yeni qurum
Prezident İlham Əliyev mülki aviasiyada uçuşların təhlükəsizliyinə yönələn fərman imzalayıb. Fevralın 2-də verilən fərmanla Nazirlər Kabineti bir ay müddətində Dövlət Mülki Aviasiya Administrasiyasının tabeliyində “Mülki Aviasiyada Uçuşların Təhlükəsizliyi üzrə Dövlət Müfəttişliyi” publik hüquqi şəxsin yaradılmasını təmin etməlidir. Hökumətə publik hüquqi şəxsin nizamnaməsini və strukturunu prezidentlə razılaşdırıb təsdiqləmək, qurumun ilkin dövrdə fəaliyyəti üçün nizamnamə fondunun formalaşmasını təmin etmək tapşırılıb.
Novator.az bildirir ki, müfəttişliyin inkişaf istiqamətlərinin müəyyən edilməsi, illik maliyyə hesabatlarının təsdiqi; icra orqanlarının yaradılması, onların səlahiyyətlərinin müəyyənləşdirilməsi və səlahiyyətlərinə vaxtından əvvəl xitam verilməsi; təsərrüfat cəmiyyətlərinin yaradılması, habelə idarə, filial və nümayəndəliklərinin rəhbərlərinin vəzifəyə təyin və vəzifədən azad edilməsinə razılıq verilməsi Dövlət Mülki Aviasiya Administrasiyasının səlahiyyətlərinə aid edilib.
Publik hüquqi şəxsin saxlanması və fəaliyyətinin təmin edilməsi xərcləri onun fəaliyyətindən əldə edilən gəlirlər (o cümlədən aldığı kreditlər, qrantlar, habelə işlərin görülməsindən, xidmətlər göstərilməsindən daxilolmalar və s.) hesabına maliyyələşdiriləcək.
Dövlət Mülki Aviasiya Administrasiyası 2006-cı ildə mülki aviasiya sahəsində dövlət siyasətinin həyata keçirilməsi üzrə səlahiyyətli orqan kimi yaradılıb.
