Moskva Lapşinin Azərbaycana verilməsini istəmir
Rusiya Xarici İşlər Nazirliyinin sözçüsü Mariya Zaxarova fevralın 3-ü Moskvada keçirdiyi brifinqdə bloqçu Aleksandr Lapşinin Azərbaycana təhvil verilməsi ehtimalını şərh edib.
Novator.az-ın məlumatına görə, Zaxarova rəsmi Moskvanın Aleksandr Lapşinin Azərbaycana təhvil verilməsinə qarşı olduğunu bildirib: “Biz daim Rusiya vətəndaşlarının üçüncü ölkəyə təhvil verilməməsində israrlıyıq. Bununla bağlı mövqeyimizi bəyan etmək məqsədilə Belarusun Xarici İşlər Nazirliyi və bu ölkənin səlahiyyətli orqanları ilə sıx təmasdayıq”.
Azərbaycanın tələbi ilə Belarusda tutulan bloqçunun Azərbaycana təhvil verilməsi haqda qərarı yanvarın 20-də Belarus Bas Prokurorluğu çıxarıb. 1976-cı ildə Rusiyada doğulan Lapşin həm bu ölkənin, həm də İsrailin vətəndaşıdır. O, 2011-ci ilin aprel və 2012-ci ilin oktyabr aylarında Azərbaycanın işğal olunmuş ərazilərinə səfər edib, özünə məxsus Puerrtto.livejournal.com portalında Dağlıq Qarabağı müstəqil dövlət kimi qələmə verib, həmçinin 6 aprel və 29 iyun 2016-cı il müraciətlərində işğal olunmuş ərazilərdə qanunsuz fəaliyyət göstərən rejimin “müstəqilliyini” dəstəkləməklə Azərbaycanın ərazi bütövlüyünün parçalanmasına yönələn çağırışlar edib.
Azərbaycanın Baş Prokurorluğunda fakta görə Cinayət Məcəlləsinin 281.2-ci (dövlət əleyhinə yönələn açıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işinə başlayıb və Lapşin dövlətlərarası axtarışa verilib. Belarusun hüquq mühafizə orqanları Lapşini ötən ilin dekabrında saxlayıb.
Bu il yanvarın 23-də Aleksandr Lapşin prezident İlham Əliyevə əfv məktubu göndərib.
Yanvarın 26-da Minsk Şəhər Məhkəməsi Aleksandr Lapşinin Azərbaycana təhvil verilməsi haqda qərardan şikayəti təmin etməyib.
Lapşinin Belarus Ali Məhkəməsinə şikayət imkanı var.
