Fərdi uçot sistemi ilə bağlı yeni statistika
Fərdi uçot sistemində qeydiyyatda olan sığortaolunanların sayı 3 milyon 393 min 453 nəfərə çatıb. Əmək və Əhalinin Sosial Müdafiəsi Nazirliyi bildirir ki, yanvar ayında əlavə olaraq 21 min 545 nəfər şəxsə fərdi şəxsi hesab açılıb, bu da əvvəlki ilin müvafiq dövrü ilə müqayisədə iki dəfədən çoxdur.
Hazırda fərdi uçot sisteminin əhatə etdiyi şəxslər arasında say baxımından birinci yeri 30-40 yaşında olanlar tutur, fərdi hesabı açılanların 25,7 faizini (872 504 nəfər) bu təbəqə təşkil edir. Sistemin əhatə etdiyi insanların 711 min 302 nəfəri (21 faiz) 50-60 yaş qrupunda olanlardır. Sistemdə 40-50 yaşında olanlar 676 min 317 nəfər (19,9 faiz), 30 yaşa qədər olanlar 676 min 300 nəfərdir (19,9 faiz). Qalan sığortaolunanlar isə 60 yaşdan yuxarı şəxslərdir.
Fərdi şəxsi hesabı açılmış vətəndaşların sayında artım daha çox 30-40 yaşlılar arasındadır. Bu yaş qrupundan olan şəxslərin sayı 2016-cı ilin fevralın 1-i ilə müqayisədə 25,7 faiz və ya 71 min 215 nəfər artıb. Müqayisə olunan dövrdə ikinci yüksək artım tempi 60 yaşdan yuxarı olanlar üzrə müşahidə edilib, onların sayı 63 min 169 nəfər və ya 16,5 faiz çoxalıb.
