Nazirlik gənclər üçün görülən işlərin hesabatını verib
2016-cı ildə Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti 56 631 nəfər işsiz və işaxtaran vətəndaşı münasib işlərlə təmin edib. Onların 36,2 faizi, həmçinin haqqı ödənilən ictimai işlərə cəlb edilən 1147 nəfərdən 27 faizi gənclər olub.
Rəsmi hesabata görə, boş vaxtları ərzində əlavə qazanc əldə etmək məqsədilə müraciət edən 3093 nəfər şəxs əmək birjaları vasitəsilə qısa müddətli işlərə göndərilib. Həmin şəxslərin 43 faizi gənclərdir.
İşaxtaran və işsiz vətəndaşların özünüməşğulluq proqramında iştirak üçün müraciət edən və biznesin təşkili ilə bağlı müvafiq bilik və bacarıqlara yiyələnmələri məqsədilə təlim kurslarına cəlb olunan vətəndaşlardan 25 faizə qədəri gənc yaşlarında olanlardır.
Ötən il nazirliyin təşkil etdiyi peşə hazırlığı və əlavə təhsil kurslarına cəlb edilən 3702 nəfərdən 2406 nəfəri (65 faiz) gənclər olub. Nazirliyin 1 saylı Sağlamlıq İmkanları Məhdud Gənclərin Peşə Reabilitasiya Mərkəzi 2016-cı ildə 350 nəfər sağlamlıq imkanları məhdud gənci peşə hazırlığı kurslarına qəbul edib.
Bakı, Gəncə, Sumqayıt, Lənkəran, Mingəçevir şəhərlərində yerləşən 10 ali təhsil ocağında məzun və tələbələrin əmək bazarına inteqrasiyası məqsədilə “Karyerada ilk addım” devizi altında tədbirlər keçirilib. Bu tədbirlərdə 370 müəssisə 1838 boş (vakant) iş yeri təqdim edib.
