Hansı ölkələr Azərbaycana daha çox sərmayə qoyub?
2016-cı ildə xarici müəssisə və təşkilatlar Azərbaycana 8 milyard 874,2 milyon manat sərmayə qoyub. Dövlət Statistika Komitəsi bildirir ki, xarici ölkələr və beynəlxalq təşkilatların vəsaitləri hesabına yönəldilmiş vəsaitin 7 milyard 373,9 milyon manatı (83,1 faizi) Birləşmiş Krallıq, Türkiyə, Malayziya, İsveçrə, Rusiya, İran, ABŞ və Yaponiya sərmayədarlarına məxsus olub.
AZƏRTAC-ın məlumatına görə, tikinti müəssisələrinin yerinə yetirdiyi inşaat işlərinin 68,3 faizini tikinti, yenidənqurma və genişləndirmə, 11,6 faizini əsaslı təmir, 3,9 faizini cari təmir, 16,2 faizini isə digər tikinti işləri təşkil edib. Ümumi inşaat işlərinin 86,8 faizini qeyri-dövlət tikinti müəssisələri yerinə yetirib.
Novator.az qeyd edir ki, 2016-cı ildə ölkənin iqtisadi və sosial sahələrinə 14 milyard 903,4 milyon manatlıq vəsait qoyulub. Bütün maliyyə mənbələrindən əsas kapitala yönəldilmiş vəsaitin 72,7 faizi tikinti-quraşdırma işlərinin yerinə yetirilməsinə xərclənib.
Vəsaitin 79,8 faizi məhsul istehsalı obyektlərinin, 15,6 faizi xidmət sahələri üzrə obyektlərin, 4,6 faizi isə ümumi sahəsi 1 milyon 677,1 min kvadratmetr olan yaşayış evlərinin tikintisinə sərf olunub.
Daxili mənbələrdən əsas kapitala yönəldilmiş vəsait ümumi sərmayənin 40,5 faizini təşkil edib.
