Benzin niyə bahalaşa bilər?
“Ölkədə bütün markalı benzinlərin qiyməti qalxa bilər”. Novator.az-ın məlumatına görə, iqtisadçı Qubad İbadoğlu belə yazır.
Fevralın 1-dən ölkəyə idxal edilən, qiyməti sərbəst tənzimlənən “Premium” markalı benzinin yeni qiyməti 1,15 manat, “Super” markalı benzinin qiyməti isə 1,20 manat müəyyənləşib. Bundan əvvəl qiymət yanvarın 13-də artmış, “Premium” 1,05 manata, “Super” isə 1,10 manata təklif olunmuşdu.
Qubad İbadoğlu bildirir ki, idxal benzininin qiymətində artım yerli istehsalın bahalaşmasına zəmin yaradır: “Bugünkü bahalaşmadan sonra idxal olunan “Premium” markalı benzin 1 manat 15 qəpik, “Super” markalı benzin isə 1 manat 20 qəpikdir. Son artımdan sonra idxal olunan benzinin 1 litrinin pərakəndə satış qiyməti ilə yerli istehsal arasında fərq xeyli çoxalıb. “Super” markalı idxal benzininin qiyməti yerli istehsal olan dizel yanacağının qiymətindən 2 dəfə, A-92 markalı benzinin qiymətindən isə 1,71 dəfə yüksəkdir.
Manatın ucuzlaşması davam etdikcə bu fərq daha da yüksələcək. Bu isə yaxın zamanlarda inhisarçı şirkətin istehsal etdiyi məhsulun qiymətini artırmaq məqsədilə Tarif Şurasına müraciəti üçün yeni əsaslar yaradır. İdxal benzininin bahalaşmasından sonra Aİ-92 benzininə tələbatın artdığı əsas götürülməklə yerli istehsal olan Aİ-92, LPC markalı yanacaqların, dizelin qiymətinin qaldırılacağı ehtimalı böyükdür.
Son günlər manatın ABŞ dollarına nisbətən sürətlə ucuzlaşması yerli yanacaq istehsalının dollar ifadəsində cari qiymətlərinin qonşu ölkələrlə müqayisədə aşağı düşməsinə və onların arasında fərqin artmasına şərait yaradır. Bu müqayisə də qiymətin qalxmasına əlavə arqumentlər verir. Odur ki, yaxın zamanlarda bütün növ markalı benzinlərin bahalaşması gözlənəndir”.
