2016-cı ilin turizm rəqəmləri
2016-ci ildə Azərbaycana gələn turistlərin sayında artım qeydə alınıb. Novator.az-ın məlumatına görə, Mədəniyyət və Turizm Nazirliyi bəyan edib ki, 2016-cı ildə ölkəyə gələn xarici vətəndaşların sayı 2 milyon 242 min 783 nəfər olub, bu da 2015-ci illə müqayisədə 11,7 faiz artım olduğunu göstərir.
Ölkəyə gələn xarici vətəndaşlar arasında Rusiya, Gürcüstan, Türkiyə və İran vətəndaşları çoxluq təşkil edib. Göstəricilər müvafiq olaraq 33 faiz, 22,5 faiz, 13,9 faiz və 10,9 faizdir.
Açıqlamaya görə, bir sıra ölkələrin, o cümlədən Qətər, Oman, Səudiyyə Ərəbistanı, Bəhreyn, Küveyt, Yaponiya, Çin, Cənubi Koreya, Malayziya və Sinqapur vətəndaşları üçün 2016-cı ildən hava limanlarında sadələşdirilmiş viza rəsmiləşdirilməsinə başlanması ölkəyə səyahət edən xarici turistlərin sayını əhəmiyyətli dərəcədə artırıb. 2015-ci illə müqayisədə 2016-cı ildə Azərbaycana İordaniyadan 2 dəfə, Küveytdən 3,2 dəfə, Qətərdən 5,5 dəfə, Səudiyyə Ərəbistanından və Omandan 10 dəfə, Birləşmiş Ərəb Əmirliklərindən 22 dəfə, İraqdan 30 dəfə çox turist gəlib.
Azərbaycan Turizm Assosiasiyası sədrinin müşaviri Müzəffər Ağakərimov AZƏRTAC-a deyib ki, 2016-cı ildə Rusiyadan gələnlərin sayında 7,1 faiz, İrandan gələnlərin sayında 58 faiz, Qazaxıstandan gələnlərin sayında isə 15,8 faiz artım olub.
