Sosialistlərin namizədi bəlli oldu
Fransada hakim Sosialist Partiyasının prezidentliyə namizədini müəyyən edən ilkin seçki yarışı başa çatıb. Novator.az-ın məlumatına görə, yanvarın 29-də keçirilən ikinci turda sabiq təhsil naziri Benua Amonla keçmiş baş nazir Manuel Vals mübarizə aparıblar. 1,1 milyon nəfərin qatıldığı seçkidə Benua Amon 58,6% səslə qalib gəlib. Manuel Vals 41,3%-lə kifayətlənərək məğlubiyyətini etiraf edib.
Benua Amon 1967-ci ildə doğulub. Tarixçidir. 19 yaşından siyasi fəaliyyətlə məşğul olur. 1993-cü ildən Sosialist Partiyasının üzvüdür. 2004-2009-cu illərdə Avropa Parlamentinin deputatı olub. 2014-cü ildə təhsil naziri postunu tutub.
54 yaşlı Manuel Vals 2002, 2007 və 2012-ci illərdə parlamentin aşağı palatasının deputatı seçilib. 2012-ci ildə daxili işlər naziri təyin olunub. Baş nazir postuna 2014-cü ilin aprel ayında gətirilib, 2016-cı ilin dekabrında istefa verib.
Fransada prezident seçkisi aprel ayında keçiriləcək. Sosialist Partiyasının liderlərindən olan dövlət başçısı Fransua Oland prezident seçkisində namizəd olmaq istəməyib.
Sağ və mərkəzçi partiyaları prezident seçkisində təmsil edəcək namizəd seçimi ötən ilin sonunda başa çatıb. Prezidentlik uğrunda sabiq baş nazir Fransua Fiyon yarışacaq.
