Penitensiar Xidmət illik hesabat verib
Penitensiar Xidmətdə 2016-cı ilin yekunlarına həsr olunan əməliyyat müşavirəsi keçirilib. Ədliyyə nazirinin müavini, Penitensiar Xidmətin rəisi Ceyhun Həsənov tədbirdə deyib ki, ötən il Milli Məclisin qəbul etdiyi amnistiya aktı penitensiar müəssisələrdə 3535 məhkuma tətbiq edilib, 2901 məhkum cəza çəkməkdən azad olunub, 634 nəfər məhkumun çəkilməmiş cəza müddəti 6 ay azaldılıb.
Qeyd olunub ki, dövlət başçısının 148 məhkumun əfv edilməsi ilə bağlı 17 mart sərəncamı vaxtında və dürüst icra olunub. Cinayət Məcəlləsinə dəyişiklikləri nəzərdə tutan 6 may 2016-cı il tarixli qanunun təsiri altına düşən şəxslərin dairəsi müəyyən edilib, müvafiq sənədlər məhkəmələrə təqdim olunub.
Novator.az bildirir ki, illik hesabata görə, həyata keçirilmiş axtarış-baxış tədbirləri nəticəsində 266 mobil telefon, 219,4 qram müxtəlif narkotik və psixotrop maddələr, 45,5 litr qıcqırdılmış maye və spirtli içki aşkar edilərək götürülüb və həmin faktlar üzrə toplanmış materiallar hüquqi qiymət verilməsi üçün aidiyyəti hüquq mühafizə orqanlarına təqdim olunub.
Digər hüquq mühafizə orqanları ilə qarşılıqlı fəaliyyət nəticəsində 443 müxtəlif cinayətin üstünün açılmasına köməklik göstərilib.
Hesabat dövrü ərzində pozuntulara yol verən 286 əməkdaş intizam məsuliyyətinə cəlb edilib, 7 əməkdaş tutduğu vəzifədən çıxarılıb, 20 əməkdaş ədliyyə orqanlarından xaric olunub.
Yanvarın 28-də keçirilmiş əməliyyat müşavirəsi haqda məlumatı Penitensiar Xidmətin ictimaiyyətlə əlaqələr şöbəsi yayıb.
