Ötən ilin qəza statistikası
Baş Dövlət Yol Polisi İdarəsinin hesabatına görə, 2016-cı ildə Azərbaycanda 2 milyon 861 min 880 yol hərəkəti qaydalarının pozuntusu aşkar edilib, 8111 sürücünün hüququ müxtəlif müddətlərə məhdudlaşdırılıb.
Ötən il 2006 yol-nəqliyyat hadisəsi qeydə alınıb, 759 nəfər həlak olub, 2003 nəfər yaralanıb. 2015-ci illə müqayisədə hadisələrin sayı 9,6%, həlak olanların sayı 15%, yaralananların sayı 11,6% azalıb.
Yol-nəqliyyat hadisələrinin 95,2%-i sürücülərin qaydaları pozması, o cümlədən 38,1%-i ötmə və qarşıdan gələn nəqliyyatın yoluna çıxma, 22,6%-i nəqliyyat vasitələrinin yüksək sürətlə idarə olunması, 12,8%-i yol ayrıclarını keçmə qaydalarının pozulması, 1,7%-i nəqliyyat vasitələrinin sərxoş vəziyyətdə idarə olunması səbəbindən baş verib.
Hadisələrin 44%-ni piyadaların vurulması təşkil edib, nəticədə 319 piyada həlak olub, 643-ü yaralanıb. 59 hadisə piyadaların qaydaları pozmasının nəticəsidir.
İl ərzində baş idarəyə 280 nəqliyyat vasitəsinin oğurlanması və qaçırılması barədə məlumat daxil olub, onlardan 227-si tapılıb.
Ötən il 10457 avtomobil ilkin qeydiyyata alınıb, 50 308 ilkin sürücülük vəsiqəsi verilib, ölkənin avtomobil parkının sayı 1 milyon 347 min 812-dir.
