Qazaxıstanda referendum hazırlığı: prezidentə cəmi iki nazir qalır
Yanvarın 26-da Qazaxıstan Konstitusiyasına dəyişikliklər layihəsi rəsmən çap olunub.
Novator.az-ın məlumatına görə, fevralın 26-dək ümumxalq müzakirəsindən keçəcək layihə prezident Nursultan Nazarbayevin təşəbbüsü ilə hazırlanıb.
Ana qanuna təklif olunan yeniliklər prezidentin səlahiyyətlərinin bir hissəsinin parlamentə və hökumətə ötürülməsini nəzərdə tutur.
Konstitusiya dəyişiklikləri gerçəkləşsə, prezident yalnız xarici işlər və müdafiə nazirlərini birbaşa təyin edəcək. Qalan hökumət üzvlərinin təyinatı, eləcə də hökumətin strukturunun təsdiqi baş nazirin təqdimatı əsasında olacaq.
Baş naziri prezident parlamentin aşağı palatasının (Məclis) razılığı ilə təyin edəcək.
Hökumətin statusuna təklif olunan dəyişikliyə görə, bu kollegial orqan prezident və parlament qarşısında cavabdehdir. Hökumətə ölkənin idarəçiliyi ilə bağlı yeni səlahiyyətlər də verilməsi nəzərdə tutulur.
Konstitusiya islahatı layihəsində vilayətlərin, respublika tabeli şəhərlərin və paytaxtın icra hakiminin təyinatı qaydasında da yeniliklər var. Layihə referendumdan keçsə, icra hakimlərini prezident yerli məclislərin razılığı ilə təyin edəcək.
76 yaşlı Nursultan Nazarbayev 1979-cu ildən ali dövlət vəzifələri tutur. Qazaxıstan Kommunist Partiyası Mərkəzi Komitəsinin katibi, Nazirlər Sovetinin sədri olub. 1989-cu il iyunun 22-də Qazaxıstan Kommunist Partiyası Mərkəzi Komitəsinin birinci katibi seçilib. 1990-cı ildən eyni zamanda Qazaxıstan SSR Ali Sovetinin sədri postunu tutub. 1990-cı ildən prezidentdir.
