Neft: qiymətlər və proqnozlar
Yanvarın 26-sı Nyu-York birjasında “Layt” markalı neftin bir barreli 52,75 dollara, London birjasında “Brent” markalı neftin bir barreli 55,08 dollara satılır. “AzəriLayt” markalı neftin bir barreli 56,05 dollara təklif olunur. Azərbaycanın 2017-ci il büdcəsində neftin qiyməti 40 dollar hesablanıb.
Qlobal neft təklifi və tələbatın isə bu il, eləcə də 2018-ci ildə artacağı vurğulanır. AZƏRTAC xəbər verir ki, ABŞ-ın Enerji İnformasiya Administrasiyasının (EİA) hesabatına görə, ötən il dünyada orta aylıq olmaqla sutkada 96,4 milyon barrel xam neft istehsal edilib. Həcmin bu il 1,4 faiz artaraq 97,5 milyon barrel, 2018-ci ildə isə daha 1,1 faiz çoxalaraq 98,9 milyon barrel olacağı proqnozlaşdırılır.
Keçən il dünya üzrə orta aylıq olmaqla gündəlik 95,6 milyon barrel neft istehlak edilib. Bu həcmin cari ildə 1,5 faiz artaraq 97,2 milyon barrel, 2018-ci ildə isə daha 1,6 faiz çoxalaraq 98,7 milyon barrel təşkil edəcəyi nəzərdə tutulur.
Hesabata əsasən, 2016-cı ildə orta hesabla 0,9 faiz azalan xam neft ehtiyatları 2017-ci ildə 0,3 faiz və 2018-ci ildə isə 0,1 faiz artacaq.
