Nazirlik elektron xidmət lideridir
2016-cı ildə “Elektron hökumət” portalında xidmətlərindən ən çox istifadə edilən dövlət qurumu Əmək və Əhalinin Sosial Müdafiəsi Nazirliyi olub. Nazirliyin rəsmi məlumatına görə, ötən ilin dekabr ayında qurumun elektron xidmətlərinə müraciətlərin sayı noyabr ayı ilə müqayisədə 56,1 faiz çoxalaraq 889 min 326-ya çatıb. Ümumilikdə 2016-cı il ərzində əhali nazirliyin elektron xidmətlərindən 6 milyon 549 min 994 dəfə faydalanıb.
Ötən il nazirliyin ən çox müraciət edilən e-xidməti “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” e-xidməti olub. Bu e-xidmətə 1 milyon 971 min 872 dəfə müraciət qeydə alınıb.
İkinci ən çox istifadə olunan elektron xidmət isə “Ünvanlı sosial yardımla bağlı müraciətin edilməsi” xidmətidir. 2016-cı il fevral ayının 22-də “Elektron hökumət” portalına inteqrasiya edilən həmin e-xidmətdən əhali cari ilin 1 yanvar tarixinədək 1 milyon 835 min 235 dəfə istifadə edib.
