Rusiyada ailə üzvünü döyəni necə cəzalandıracaqlar?
Rusiyada ailə üzvlərini və başqa yaxın adamlarını döyənlərin dərhal cinayət məsuliyyətinə cəlb olunmasını nəzərdə tutan müddəanın ləğvi üçün hazırlanmış qanun layihəsi Dövlət Dumasında ikinci oxunuşdan da keçib.
Novator.az xəbər verir ki, bu qanun layihəsi Rusiyada 2016-cı ildə Cinayət Məcəlləsinə edilən düzəlişlərdən sonra ortaya çıxıb.
2016-cı ilin iyulunda Cinayət Məcəlləsinə edilən düzəlişlər ailə üzvlərini və başqa yaxın adamlarını döyənlərin dərhal cinayət məsuliyyətinə cəlb olunmasını nəzərdə tutur. Amma bu müddəa cəmiyyətdə birmənalı qarşılanmayıb. Qanunu tənqid edənlər deyiblər ki, kimsə yad adamı döyəndə əvvəlcə inzibati qaydada cəzalandırılır. Onda nə üçün yaxın adamını döyən birbaşa cinayət məsuliyyətinə cəlb edilməlidir? Doğrudanmı ailədaxili münaqişə yad adamlar arasındakı münaqişədən daha təhlükəli hadisədir?
Tənqidlərdən sonra ailə üzvlərini və başqa yaxın adamlarını döyənlərin də əvvəlcə inzibati qaydada cəzalandırılmasını nəzərdə tutan layihə hazırlanıb. Yanvarın 25-də Dövlət Dumasında ikinci oxunuşdan keçən bu layihə ailə üzvünə və digər yaxın adamına yalnız təkrar güc tətbiq edən şəxsin cinayət məsuliyyətinə cəlb olunmasına icazə verir.
