Torpaq müfəttişləri 4900-ə yaxın pozuntu aşkar edib
Əmlak Məsələləri Dövlət Komitəsi 2016-cı ildə görülmüş işlər və qarşıda duran vəzifələrə dair müşavirə keçirib. Müşavirədə çıxış edən komitə sədri Kərəm Həsənov deyib ki, torpaqların səmərəli istifadə olunması və mühafizəsinə nəzarət məqsədilə Bakı və regionlarda monitorinqlər və reydlərin keçirilməsi işləri davam etdirilir: “İndiyədək torpaq müfəttişləri 4900-ə yaxın, 2016-cı il ərzində isə 1300-ə yaxın qanun pozuntusu aşkar edib. Monitorinqlər zamanı pozuntu hallarının qarşısının alınması, qanunvericiliyə əsasən cəza tədbirləri və inzibati tədbirlərin görülməsi təmin olunub”.
Hesabata görə, 2016-cı ildə ölkə üzrə 172 minə yaxın daşınmaz əmlak obyekti üzərində mülkiyyət hüquqları qeydiyyata alınıb. Bu göstəricinin 50 minə yaxını ilkin, 122 min isə təkrar qeydiyyata aid olub. 2015-ci ildəki göstəricilərlə müqayisədə ötən il ilkin qeydiyyata dair verilmiş çıxarışların sayında 18,7% artma, tərtib olunmuş texniki pasportların sayında 4.5% artma qeydə alınıb.
