Sabiq baş nazir hakim partiyadan getdi
Ermənistanın sabiq baş naziri Ovik Abramyan hakim Respublika Partiyasını tərk edib. Novator.az-ın məlumatına görə, Ovik Abramyan hakim partiyada sədr müavini postunu tuturdu. Partiyaya prezident Serj Sərkisyan sədrlik edir.
Ermənistan mətbuatı yazır ki, son günlər Ovik Abramyan hakim partiyanın rəhbərliyi ilə gələcək siyasi fəaliyyəti ilə bağlı müzakirələr aparıb, ancaq müzakirələr nəticəsiz qaldığından sabiq baş nazir partiyadan ayrılmaq qərarına gəlib. Ovik Abramyanın siyasi fəaliyyətini davam etdirəcəyi bildirilir.
Ovik Abramyan baş nazir postundan ötən il sentyabrın 8-də istefa verib.
1958-ci ildə Artaşat rayonunda doğulan Ovik Abramyan Yerevan Xalq Təsərrüfatı İnstitutunu bitirib. Artaşat Konyak-Şərab Zavodunun direktoru, şəhər soveti icraiyyə komitəsinin sədri, şəhər meri, Ararat vilayətinin qubernatoru vəzifələrində çalışıb. Ermənistan hökumətində nazir postları tutub, baş nazirin müavini, Prezident Aparatının rəhbəri olub. 2008-2011-ci illərdə parlament sədri vəzifəsində çalışıb, 2012-ci ildə yenidən spiker seçilib. 2014-cü il aprelin 13-də baş nazir təyin edilib.
