Fransa: solçuların yarışında iki nəfər önə çıxdı
Fransada hakim Sosialist Partiyasının və digər solçuların prezidentliyə namizədini müəyyən etmək üçün ilkin seçki yarışı başlayıb. Novator.az-ın məlumatına görə, yanvarın 22-də keçirilən ilk turda sabiq təhsil naziri Benua Amon və keçmiş baş nazir Manuel Vals önə çıxıblar.
7 nəfərin qatıldığı seçkidə Benua Amon 36,3%, Manuel Vals 31,1% səs toplayıb. Onlar yanvarın 29-na təyin olunmuş ikinci turda mübarizə aparacaqlar.
Prezident seçkisi aprel ayında keçiriləcək. Sosialist Partiyasının liderlərindən olan dövlət başçısı Fransua Oland prezident seçkisində namizəd olmaq istəməyib. O deyib ki, dövlət başçısı seçilməzdən əvvəl verdiyi vədlərin hamısının gerçəkləşməsi mümkün olmayıb, bəzi səhvlərə yol verib, populyarlığı aşağı düşüb.
Sağ və mərkəzçi partiyaları prezident seçkisində təmsil edəcək namizəd seçimi ötən ilin sonunda başa çatıb. Prezidentlik uğrunda sabiq baş nazir Fransua Fiyon yarışacaq.
