Minimum əməkhaqqı 11 manat artdı
Yanvarın 21-də prezident İlham Əliyev minimum aylıq əməkhaqqının artırılması haqqında sərəncam imzalayıb. Sərəncama əsasən, 2017-ci il yanvarın 1-dən minimum aylıq əməkhaqqının məbləği 116 manat müəyyən edilib.
Xatırladaq ki, 2013-cü il sentyabrın 1-dən minimum aylıq əməkhaqqının məbləği 105 manat idi.
Yanvarın 21-də dövlət başçısı əmək pensiyalarının sığorta hissəsinin indeksləşdirilməsi haqqında da sərəncam verib. Sərəncamda Əmək və Əhalinin Sosial Müdafiəsi Nazirliyinə tapşırılıb ki, 2016-cı il üzrə istehlak qiymətləri indeksinə uyğun olaraq 2017-ci ilin 1 yanvar tarixinə bütün növ əmək pensiyalarının sığorta hissəsinin artırılmasını təmin etsin və fərdi uçot sistemində fərdi hesabların sığorta hissəsində toplanmış pensiya kapitalı məbləğlərinin indeksləşdirilməsini həyata keçirsin.
