İlin ilk ekoloji yoxlamasında nələr üzə çıxıb?
Ekologiya və Təbii Sərvətlər Nazirliyi yanvarın 15-dək qeydə alınmış pozuntular barədə məlumat yayıb. Qeyd olunur ki, Ətraf Mühitin Mühafizəsi Departamentinin apardığı araşdırma zamanı atmosfer havasının, su və torpaq ehtiyatlarının, yerin təkinin, fauna və floranın mühafizəsi, o cümlədən ətraf mühitə məişət və istehsalat tullantıları atılması sahəsində yol verilmiş qanun pozuntularına görə 54 akt və protokol tərtib olunub, nöqsanların aradan qaldırılması üçün icrası məcburi olan 7 müddətli göstəriş verilib.
Ümumilikdə 9 iş üzrə 12400 manat məbləğində inzibati cərimə, ətraf mühitə tullantıların atılmasına və axıdılmasına görə hüquqi və fiziki şəxslərə qarşı 506 iş üzrə 42776,75 manat məbləğində ödəmə tətbiq edilib, dəymiş ziyana görə 4 iş üzrə 3286,14 manat məbləğində iddia qaldırılıb.
Tədbir görülməsi üçün hüquq mühafizə orqanlarına 12, icra qurumlarına 20, məhkəmələrə isə 1 iş göndərilib.
