And içib vətəndaş oldular
Dövlət Miqrasiya Xidmətində Azərbaycan vətəndaşlığına yeni qəbul və bərpa olunmuş şəxslərlə görüş keçirilib. Vətəndaşlığa qəbul və bərpa edilmiş şəxslər and içiblər. Yanvarın 18-nə aid rəsmi məlumata görə, Azərbaycan prezidentinin sərəncamları ilə əcnəbi və vətəndaşlığı olmayan 245 şəxs vətəndaşlığa qəbul edilib, 2 nəfər isə vətəndaşlığa bərpa olunub.
Novator.az bildirir ki, qanuna görə, ölkə ərazisində son beş il ərzində fasiləsiz olaraq qanuni əsaslarla daimi yaşayan, qanuni gəlir mənbəyi olan, Azərbaycan Konstitusiyasına və qanunlarına riayət olunması barədə öhdəlik götürən, habelə dövlət dilini bilməsi haqqında sənəd təqdim edən əcnəbi və vətəndaşlığı olmayan şəxs öz vəsatəti ilə Azərbaycan vətəndaşlığına qəbul edilə bilər.
Şəxsin elm, texnika, mədəniyyət və ya idman sahələrində yüksək nailiyyətləri olduqda, şəxs Azərbaycan Respublikası üçün xüsusi maraq kəsb etdikdə və digər müstəsna hallarda əcnəbilərin və vətəndaşlığı olmayan şəxslərin müddət nəzərə alınmadan vətəndaşlığa qəbulu mümkündür. Azərbaycan Respublikasının qarşısında xüsusi xidmətləri olan şəxs şərtlər nəzərə alınmadan vətəndaşlığa qəbul edilə bilər.
Qanun əvvəllər Azərbaycan vətəndaşı olmuş və ya vətəndaşlığına xitam verilmiş şəxsin müəyyən məhdudiyyətlər nəzərə alınmaqla Azərbaycan Respublikasının vətəndaşlığına bərpasını da nəzərdə tutur.
Azərbaycan Respublikasının vətəndaşlığına qəbul edilmiş və ya Azərbaycan Respublikasının vətəndaşlığına bərpa edilmiş və 14 yaşı tamam olmuş şəxs Azərbaycan Respublikasının dövlət dilində Azərbaycan Respublikasına sadiq olacağı barədə and içir.
