Yoluxucu xəstəliklərin profilaktikası ilə bağlı hesabat
Səhiyyə Nazirliyi yoluxucu xəstəliklərin profilaktikası ilə bağlı hesabat yayıb. Rəsmi məlumata görə, 2016-cı ildə yeni doğulanların 97,8 faizi vərəm əleyhinə BCG, 98 faizi HepB, 97,8 faizi poliomielit əleyhinə (OPV0) peyvənd edilib: “1 yaşa qədər uşaqların 95,6 faizi göyöskürək, difteriya, tetanus, b tipli hemofil infeksiya və hepatit B əleyhinə pentavaksinlə (GDTHibHepB3), 97,6 faizi poliomielit (OPV3), 96,5 faizi pnevmokok, 97,9 faizi qızılca-parotit-məxmərək əleyhinə peyvənd olunub.
Ölkədə 1995-cı ildən poliomielit, 2008-ci ildən məxmərək, 2010-cu ildən difteriya, 2013-cü ildən qızılca, 2014-cü ildən göyöskürək, 2016-cı ildən epidemik parotit xəstəlikləri qeydə alınmayıb, tetanus xəstəliyinə isə tək-tək hallarda rast gəlinib.
Profilaktik peyvənd təqviminə son 5 ildə yeni peyvəndlər – 2011-ci ildə B tipli hemofil infeksiyaya qarşı, 2013-cü ildə pnevmokok əleyhinə, 2016-cı ildə inaktivləşdirilmiş poliomielit vaksinlər daxil edilib, bununla ölkədə 11 xəstəliyə qarşı peyvənd təmin olunub”.
