Ötən il ölkə iqtisadiyyatı 3,1 faiz geriləyib
Dövlət Statistika Komitəsi ümumi daxili məhsul istehsalı barədə hesabat yayıb. Novator.az-ın məlumatına görə, hesabatda qeyd olunur ki, 2016-cı ildə ölkə rezidentləri 59 milyard 987,7 milyon manatlıq və ya 2015-ci ildəkindən 3,1 faiz az ümumi daxili məhsul istehsal edib. Azalmanın əsas səbəbinin tikinti sektorunda əlavə dəyərin 2015-ci ilə nisbətən 27,6 faiz düşməsi olduğu bildirilir.
Ötən il informasiya və rabitə sahələrində əlavə dəyər istehsalı 4,5 faiz, kənd təsərrüfatı, meşə təsərrüfatı və balıqçılıq sahələrində 2,6 faiz, ticarət və nəqliyyat vasitələrinin təmiri sahələrində 1,5 faiz, sənayedə 0,4 faiz, turizm və ictimai iaşə sahələrində isə 0,1 faiz artıb.
Sənayedə 22 milyard 434,5 milyon manatlıq, ticarət və nəqliyyat vasitələrinin təmiri sahələrində 6 milyard 152,2 milyon manatlıq, tikintidə 6 milyard 4,4 milyon manatlıq, nəqliyyat və anbar təsərrüfatı sahələrində 4 milyard 102,4 milyon manatlıq, kənd təsərrüfatı, meşə təsərrüfatı və balıqçılıqda 3 milyard 369,6 milyon manatlıq, turistlərin yerləşdirilməsi və ictimai iaşə sahələrində 1 milyard 436,3 milyon manatlıq, informasiya və rabitə sahələrində 1 milyard 60,2 milyon manatlıq əlavə dəyər yaradılıb.
ÜDM-in 10 milyard 836,9 milyon manatı iqtisadiyyatın digər sahələrində istehsal edilib, məhsula və idxala xalis vergilər 4 milyard 591,2 milyon manat olub.
Ümumi daxili məhsulun 39 milyard 403,1 milyon manatı, yəni 65,7 faizi iqtisadiyyatın qeyri-neft sahələrinin, 34,3 faizi (20 milyard 584,6 milyon manatı) isə neft-qaz sektorunun payına düşüb.
Ümumi daxili məhsulun əhalinin hər nəfərinə düşən dəyəri 6223,8 manat olub.
