Azərbaycanın ABŞ-dakı səfiri gedən hakimiyyəti qınadı
ABŞ Dövlət Departamentində yeni administrasiyadan xarici siyasət gözləntiləri mövzusunda konfrans keçirilib. AZƏRTAC-ın yanvarın 18-i Vaşinqtondan yaydığı məlumata görə, Amerika Xarici Siyasi Xidmət Assosiasiyasının təşkil etdiyi konfransın əsas məqsədi Vaşinqtonda çalışan diplomat və ekspertlərin iştirakı ilə fikir mübadiləsi olub.
Dövlət Departamentinin və Vaşinqtondakı düşüncə mərkəzlərinin nümayəndələrinin, habelə diplomatik korpusun təmsilçiləri daxil olmaqla təqribən 150 nəfər qatıldığı konfransda Azərbaycanın ABŞ-dakı səfiri Elin Süleymanov da çıxış edib. O, Azərbaycanla ABŞ arasındakı münasibətlərin tarixindən danışıb, son 8 ildə ABŞ-ın apardığı xarici siyasətin bu ölkənin bir çox müttəfiq və tərəfdaşlarını məyus etdiyini xatırladıb. Diplomat yeni administrasiyanın ardıcıl, strateji yanaşma tətbiq edəcəyinə, öz tərəfdaşları ilə münasibətləri suveren bərabərlik, qarşılıqlı hörmət və maraqlar əsasında inkişaf etdirəcəyinə dair ümidini ifadə edib.
1960-cı ildə yaradılmış Amerika Xarici Siyasi Xidmət Assosiasiyası ən nüfuzlu qeyri-hökumət təşkilatlarından biridir. Qurumun əsas vəzifəsi ABŞ diplomatik icmasına dəstək verməkdir.
Novator.az xatırladır ki, 2009-cu ildən ABŞ prezidenti olan demokrat Barak Obamanın səlahiyyət müddəti başa çatır. Yanvarın 20-dən ABŞ-a respublikaçı Donald Tramp prezidentlik edəcək.
