Vergi amnistiyası: nazirlik detalları açıqlayıb
Vergilər Nazirliyi vergi borclarına amnistiya ilə bağlı yeni məlumat yayıb. Novator.az xatırladır ki, yanvarın 1-də vergi borclarının tənzimlənməsi qanunu qüvvəyə minib. Qanuna əsasən, vergi ödəyicisi 2017-ci ilin yanvar ayı ərzində maliyyə sanksiyasının 30 faizini ödədikdə ödənməmiş 70 faiz silinir. Yanvar-fevral ayları ərzində maliyyə sanksiyalarının 50 faizi ödəndikdə vergi ödəyicisi maliyyə sanksiyalarının ödənməmiş 50 faizindən, yanvar-mart ayları ərzində maliyyə sanksiyalarının 70 faizi ödəndikdə maliyyə sanksiyalarının ödənməmiş 30 faizindən azad edilir.
İcrası Vergilər Nazirliyinə tapşırılan qanunun müddəaları vergi ödəyicilərinin borclarının məcburi ödənilməsi barəsində məhkəmə qərarı qəbul edilmiş, lakin 1 yanvar 2017-ci ilə ödənilməmiş hissələrinə də şamil olunur.
Yanvarın 16-da Vergilər Nazirliyi faiz və maliyyə sanksiyaları üzrə 1 yanvar 2017-ci ilə mövcud olan borcları qeyd-şərtsiz olaraq silinmiş hüquqi şəxslərin və fiziki şəxslərin siyahılarını açıqlayıb. 1 yanvar 2017-ci ilə mövcud olan borcların müəyyən faiz hissəsi ödəniləcəyi təqdirdə yerdə qalan maliyyə sanksiyaları üzrə borcları silinə bilən vergi ödəyiciləri də məlumdur: hüquqi şəxslərin siyahısı; fiziki şəxslərin siyahısı.
Nazirlik rəsmi məlumata vergi borclarının silinməsi qaydasını və silinə biləcək borc məbləğlərini hesablayan elektron kalkulyatoru da əlavə edib.
