Davos rekordçuları: İlham Əliyev qəbulda iştirak edib
Dünya İqtisadi Forumunda iştirak üçün yanvarın 16-dan İsveçrə Konfederasiyasında olan prezident İlham Əliyevin işgüzar səfəri davam edir. Yanvarın 16-da Dünya İqtisadi Forumunun icraçı sədri Klaus Şvabın adından forumda on dəfədən artıq iştirak edən rəhbər şəxslərin qəbulu təşkil olunub. Qəbulda iştirak edən İlham Əliyev Klaus Şvabla görüşüb.
AZƏRTAC xəbər verir ki, İlham Əliyev həmin gün “McKinsey” şirkətinin qlobal idarəedici tərəfdaşı Dominik Barton və Avropa Yenidənqurma və İnkişaf Bankının prezidenti Suma Çakrabarti ilə də görüşüb.
47-ci Dünya İqtisadi Forumu yanvarın 17-dən 20-dək keçiriləcək. Dünyanın aparıcı siyasətçilərinin, iş adamlarının, top-menecer və ekspertlərinin iştirak edəcəyi forumun şüarı “Bacarıqlı və məsuliyyətli liderlik”dir. Davosa 50-dən çox dövlət və hökumət başçısı, habelə aparıcı beynəlxalq korporasiyaların rəhbərləri dəvət edilib.
Ötən il Dünya İqtisadi Forumunda onuncu dəfə iştirak etdiyinə görə İlham Əliyevə Davos fəxri üzvlər klubunun nişanı təqdim olunmuşdu.
