“Təfəkkür” Universiteti bağlandı
Elm və Təhsil Mərkəzi “Təfəkkür” Universitetinin fəaliyyəti dayandırılır. Təhsil Nazirliyinin yanvarın 16-da yaydığı məlumatda bildirilir ki, Təsisçilər Şurası universitetin maliyyə vəziyyətində yaranan problemlərlə əlaqədar fəaliyyəti dayandırmaq qərarı qəbul edib.
Təhsil Nazirliyi tələbə kontingentinin digər ali təhsil müəssisələrinə yerləşdirilməsini təşkil etmək məqsədilə işçi qrupunun yaradılması barədə qərar qəbul edib. İşçi qrupuna universitetdə təhsil alan tələbələrin digər ali təhsil müəssisələrinə köçürülməsi ilə bağlı təkliflər hazırlayıb nazirliyin rəhbərliyinə təqdim edilməsi və digər təşkilati tədbirlərin görülməsi tapşırılıb.
Nazirlik bildirir ki, tələbələrə ixtisasları, habelə qəbul imtahanlarında topladıqları balları nəzərə alınmaqla müvafiq ali təhsil müəssisələrində maneəsiz yerləşdirilməsi üçün lazımi şərait yaradılacaq, köçürüləcək universitetlərdə onlar üçün təhsil haqqının artımına yol verilməyəcək.
Novator.az qeyd edir ki, Elm və Təhsil Mərkəzi “Təfəkkür” Universiteti ali təhsil müəssisəsi kimi 1992-ci ildən fəaliyyətə başlayıb. Azərbaycan Kommersiya İnstitutunun hüquqi varisidir. Nazirlər Kabinetinin 11 sentyabr 1995-ci il qərarı ilə “Təfəkkür” Universiteti qeyri-dövlət ali təhsil müəssisəsi kimi qeydə alınıb. 29 may 1996-cı ildən Elm və Təhsil Mərkəzi “Təfəkkür” Universiteti adlandırılıb.
