Məzuniyyət bilgiləri niyə dayandırılıb?
Əvvəllər prezidentin mətbuat xidməti dövlət başçısı İlham Əliyevin məzuniyyətə çıxması ilə bağlı rəsmi bilgilər yayardı. Son illər belə məlumatlar verilmir. Novator.az rəsmi saytlara (Azertag.az, President.az) nəzər salaraq müəyyən edib ki, axırıncı belə məlumat 2008-ci ildə olub: prezidentin mətbuat xidməti həmin il iyulun 15-də dövlət başçısı İlham Əliyevin qısamüddətli məzuniyyətə çıxdığını bəyan edib.
2006-cı il yanvarın 2-də, iyulun 9-da, 2007-ci il yanvarın 2-də, iyulun 5-də, noyabrın 26-da da prezidentin qısamüddətli məzuniyyətə çıxması barədə rəsmi xəbərlər verilib.
Prezidentin 2008-ci ildən bəri məzuniyyətə çıxması barədə rəsmi xəbərlərin olmaması nə ilə bağlıdır: dövlət başçısı məzuniyyətə çıxmır, yoxsa bu barədə məlumat vermək ənənəsi dayandırılıb? Novator.az bu sualı Azərbaycan Respublikası prezidentinin mətbuat xidmətinə ünvanlayıb. Təəssüf ki, mətbuat xidmətindən cavab almaq mümkün olmayıb.
