Cəbhəçi gəncin şikayəti təmin edilmədi
Yanvarın 16-da Bakı Apellyasiya Məhkəməsi AXCP-nin həbsdə olan gənc üzvü Fuad Əhmədlinin həbsinin martın 12-dək uzadılmasından verilmiş şikayətə baxıb. Şikayət təmin edilməyib.
Vəkil Əsabəli Mustafayev “Turan”a açıqlamasında həbsin uzadılmasının əsassız olduğunu vurğulayıb. O deyib ki, Fuad Əhmədlinin səhhətində problemlər var, istintaq təcridxanasında isə müalicə üçün lazımi şərait yoxdur.
Fuad Əhmədli ötən il avqustun 18-də Bakıda saxlanıb. Ona Cinayət Məcəlləsinin 302.1 (əməliyyat-axtarış fəaliyyəti haqqında qanunvericiliyi pozma) və 308.1-ci (vəzifə səlahiyyətlərindən sui-istifadə) maddələri ilə ittiham irəli sürülüb.
Sonradan onun işi həbsdə olan AXCP sədrinin köməkçisi, “Azadlıq” qəzetinin maliyyə direktoru Faiq Əmirlinin işi ilə bir icraatda birləşdirilib. Faiq Əmirli ötən il avqustun 20-də Bakıda tutulub. İstintaq onu ABŞ-da yaşayan türkiyəli ilahiyyatçı Fətullah Gülənin rəhbərlik etdiyi “Hizmət hərəkatı”nın nümayəndəsi kimi təqdim edir, dini düşmənçiliyin salınması, dini məzhəbləri yaymaq adı altında vətəndaşların hüquqlarını pozan qrup təşkil etməkdə günahlandırır.
AXCP hər iki həbsin siyasi xarakterli olduğunu bəyan edir.
