Bakıda yeni əczaçılıq zavodunun təməli qoyuldu
Yanvarın 16-sı Bakıda, Pirallahı Sənaye Parkında “Caspian Pharmed” əczaçılıq zavodunun təməli qoyulub. AZƏRTAC xəbər verir ki, mərasimdə İranın kooperasiya, əmək və sosial rifah naziri Əli Rəbii və Azərbaycanın iqtisadiyyat naziri Şahin Mustafayev iştirak ediblər.
“TPİCO” (İran) layihədə 49 faiz, “Azersun Holdinq” 26 faiz, Azərbaycan İnvestisiya Şirkəti 25 faiz paya sahibdir. Layihə 3 mərhələdən ibarət olacaq. Birinci mərhələdə həb və kapsul istehsalı, ikinci mərhələdə ampula və flakon istehsalı, üçüncü mərhələdə isə antibiotik dərmanlarının istehsalı həyata keçiriləcək.
Zavodun ilkin istehsal gücünün ildə 200 milyondan çox həb və kapsul, 54 təsiredici maddə, 84 adda dərman preparatı olacağı bildirilir.
