Dövlət sərhədində yeni təxribat
Müdafiə Nazirliyi yanvarın 13-də məlumat yayıb. Qeyd olunur ki, yanvarın 12-də dövlət sərhədinin Tovuz rayonu sahəsində, qoşunların qarşıdurma xəttinə yaxın əraziyə PUA vasitəsilə partlayıcı qurğu atılıb: “Mənşəyi və mənsubiyyəti məlum olmayan, qeyri-ənənəvi üsulla hazırlanan partlayıcı vasitələrin tətbiqi müdafiənin ön xəttində yerləşən bölmələrin şəxsi heyətinə, həmsərhəd ərazilərdəki yaşayış məntəqələrinin dinc əhalisinə, xüsusilə də uşaqlara xəsarət yetirmək məqsədi güdür.
Partlayıcı qurğunun zərərsizləşdirildikdən sonra ilkin öyrənilməsi zamanı bu vasitənin elektrik detonatoru, detonasiya qaytanı, çoxlu sayda metal qəlpə və qurğunun işə salınması üçün batareyalardan ibarət olduğu müəyyən edilib.
Ermənistanın beynəlxalq normativ hüquqi qaydalarla istifadəsi qadağan olunan bu cür vasitələrin məqsədyönlü şəkildə tətbiq etməsi vəziyyəti gərginləşdirmək, Azərbaycanı cavab tədbirləri görməyə təhrik etmək və bununla da təmsil olunduğu hərbi-siyasi blokun digər üzvlərinin diqqətini növbəti dəfə cidd-cəhdlə münaqişəyə cəlb etmək məqsədi güdür.
Müdafiə Nazirliyi bildirir ki, baş verə biləcək hər hansı insidentə və onun nəticələrinə görə məsuliyyət tamamilə Ermənistanın kriminal hərbi-siyasi rejiminin üzərinə düşür”.
