Tacikistan prezidenti oğlunu paytaxt meri postuna təyin etdi
Yanvarın 12-də Tacikistan prezidenti İmaməli Rəhman oğlu Rüstəm İmaməlini paytaxt Düşənbənin meri postuna təyin edib. Novator.az xəbər verir ki, Rüstəm İmaməli bu təyinata qədər Maliyyə Nəzarəti və Korrupsiya ilə Mübarizə Agentliyinin rəhbəri idi.
Rüstəm Rəhman İmaməli 1987-ci il dekabrın 19-da anadan olub.
2016-cı ilin mayında Tacikistanda konstitusiyaya əlavə və dəyişikliklər referendumu keçirilib. Ana qanunda dəyişiklik dövlət başçısı İmaməli Rəhmana qeyri-məhdud sayda prezident seçilmək imkanı yaradıb. İmaməli Rəhman 2020-ci ildə keçiriləcək prezident seçkisində öz namizədliyini irəli sürə biləcək. O, Tacikistana 1992-ci ildən rəhbərlik edir, əvvəl parlamentin sədri olub, 1994-cü ildən prezident postunu tutur.
Əsas dəyişikliklərdən biri də prezidentliyə namizədlərin yaş həddinin 35-dən 30-a qədər azaldılmasıdır. Bu yeniliyin prezidentin oğlu Rüstəm İmaməli üçün tətbiq olunduğu bildirilir. 2020-ci ilin prezident seçkisində Rüstəm İmaməlinin 33 yaşı olacaq.
