Azərbaycanda “rus sektoru”
1991-ci ildə Sovet İttifaqı dağılandan sonra müstəqilliyini qazanmış respublikalarda, o cümlədən Azərbaycanda rus dilində tədris məsələsinə müxtəlif yanaşmalar olub. İstər orta, istərsə də ali təhsil müəssisələrində sovet dövründən qalma rus bölmələrinin ləğvinin tərəfdarları da var, əleyhdarları da. Bu mövzu zaman-zaman ölkə mediasında müzakirə olunub, son dövrlərdə sosial şəbəkələrdə də müzakirəyə çıxarılır.
Rus dilində tədrisin real vəziyyətini isə rəqəmlərsiz bilmək mümkün deyil. Bunu nəzərə alaraq Novator.az ölkədə rusca təhsilin hazırkı durumunu əks etdirən statistik arayış hazırlayıb.
Azərbaycanda 120 min nəfərdən çox rus yaşayır. Bu, Azərbaycan əhalisinin təxminən 1,3 faizi deməkdir. Azərbaycan əhalisinin ümumi sayı 9 milyon 794 min nəfərdir.
Ölkədə 340 orta məktəbdə tədris rus dilində aparılır. Bu, orta məktəblərin 7,6 faizində tədrisin rus dilində aparılması deməkdir. Ölkədə orta məktəblərin ümumi sayı 4472-dir.
Tədrisin rus dilində aparıldığı 340 məktəbdə 90 min şagird rus dilində təhsil alır. Bu, ölkədə ümumən şagirdlərin 6,3 faizinin rus dilində təhsil alması deməkdir. Azərbaycanda şagirdlərin ümumi sayı 1 milyon 416 min nəfərdir. Həmin şagirdlərin 450 mindən çoxu rus dilini xarici dil kimi öyrənir ki, bu da ölkə şagirdlərinin 32 faizi deməkdir.
Ölkədə fəaliyyət göstərən ali təhsil müəssisələrində isə bütün ixtisasların 70 faizdən çoxu rus dilində də tədris olunur.
Göstəricilər son dövrlərdə rus bölməsində təhsil alan şagirdlərin sayının artdığına dəlalət edir. Qeyd etmək lazımdır ki, əslində bu, valideynlərin seçiminin nəticəsidir. Yəni rus bölməsində təhsil alan şagirdlərin sayı ona görə artır ki, övladını rusca oxutmaq istəyən valideynlərin sayı artır.
