XİN-in qara siyahısına 623 nəfər düşüb
Azərbaycanın işğaldakı ərazilərinə qanunsuz gedən 180 əcnəbi jurnalist Xarici İşlər Nazirliyinin arzuolunmaz şəxslər siyahısına salınıb. Bunu AZƏRTAC-a Xarici İşlər Nazirliyinin mətbuat xidmətinin rəhbəri Hikmət Hacıyev deyib.
Hacıyevin sözlərinə görə, işğal olunmuş ərazilərə qanunsuz gedən jurnalistlər daha çox MDB məkanını əhatə edib, Rusiya və Ukraynadan olan jurnalistlər bu baxımdan daha çoxdur.
XİN rəsmisi qeyd edib ki, işğal olunmuş ərazilərə qanunsuz səfərlə əlaqədar nazirliyin qara siyahısına 623 nəfər daxil edilib: “2016-cı ildə onlardan 20-yə yaxını rəsmi şəkildə üzr istədiyinə görə XİN-in arzuolunmaz şəxslər siyahısından çıxarılıb. Onların arasında Litva, Yaponiya və Avstriyadan olan jurnalistlər də var. Daha çox Rusiya, Almaniya, Fransa, İtaliya, ABŞ-dan olan əcnəbilər Azərbaycanın işğal olunmuş ərazilərinə səfər ediblər”.
2017-ci ildə Dağlıq Qarabağ münaqişəsinin yeni mərhələsi 30-cu ilinə qədəm qoyub. 1988-ci ildən başlayaraq Ermənistanın Azərbaycana hərbi təcavüzü nəticəsində Dağlıq Qarabağ bölgəsi (Ağdərə, Xocavənd, Xankəndi, Xocalı, Şuşa) və onun həndəvərindəki 7 rayon (Laçın, Kəlbəcər, Zəngilan, Qubadlı, Cəbrayıl, Ağdam, Füzuli) zəbt edilib.
Azərbaycanın işğal altında olan ərazilərinə Azərbaycan dövlətinin rəsmi icazəsi olmadan səfər edənlər XİN-in arzuolunmaz şəxslər siyahısına salınır və onların Azərbaycana girişinə qadağa qoyulur.
