Naxçıvan səfərində nələr oldu?
Yanvarın 11-də Naxçıvan Muxtar Respublikasına səfər edən prezident İlham Əliyev Ordubad Su Elektrik Stansiyasının təməlini qoyub, Culfa və Şahbuz rayonlarının içməli su təchizatı və kanalizasiya sistemlərinin istifadəyə verilməsi mərasimlərində, Fövqəladə Hallar Nazirliyinin zabit və gizirləri üçün inşa olunmuş yaşayış binasının, Əlahiddə Ümumqoşun Ordusunun “N” saylı hərbi hissəsindəki əsgər yataqxanasının və Əsgəri-Məişət Kompleksinin açılışlarında iştirak edib.
Ordubad Su Elektrik Stansiyasının gücü 36 meqavat olacaq. Derivasiya tipli stansiya Araz çayı üzərində yerləşəcək.
Culfa və Şahbuz rayonlarında sutəmizləyici qurğular 2045-ci ilə qədər əhalini və sənaye sahəsini gün ərzində 24 saat ekoloji cəhətdən təmiz su ilə təchiz edəcək.
Naxçıvanda Fövqəladə Hallar Nazirliyinin zabit və gizirləri üçün inşa olunmuş yaşayış binasında 48 mənzil var. Onlardan 24-ü ikiotaqlı, 24-ü üçotaqlıdır.
Əlahiddə Ümumqoşun Ordusunun “N” saylı hərbi hissəsindəki əsgər yataqxanası 900 yerlikdir. Binada ümumi sahəsi 800 kvadratmetr olan 24 otaq var.
Əsgəri-Məişət Kompleksinin ümumi sahəsi 6172 kvadratmetrdir. Binada poçt xidmətləri üçün otaq, mağaza və çay evi də hərbi qulluqçuların ixtiyarına veriləcək. Kompleksdə 1000 yerlik iki, 500 yerlik bir və 250 yerlik iki yemək salonu var. Ümumilikdə, burada eyni vaxtda 3000 hərbçi qidalana bilər.
Dövlət başçısı hərbi hissədə silahlanmaya yeni qəbul edilən hərbi texnika ilə də tanış olub.
Həmin gün Naxçıvan şəhər 3 nömrəli tam orta rus məktəbinin binası əsaslı yenidənqurmadan sonra istifadəyə verilib. Prezident İlham Əliyev məktəbin pedaqoji kollektivi və şəhər ictimaiyyətinin nümayəndələri ilə görüşüb, mərasimdə çıxış edib.
Bununla da səfər başa çatıb.
