“Yahoo!” adını dəyişir
ABŞ-ın “Yahoo!” internet şirkəti adını dəyişir. Bu, “Verizon” telekommunikasiya şirkəti ilə sövdələşmə əsasında gerçəkləşir. Novator.az-ın məlumatına görə, razılaşma əsasında icraçı direktor Marissa Mayer daxil olmaqla bir neçə rəhbər şəxsin şirkəti tərk etməsi də nəzərdə tutulur.
1994-cü ildə yaradılmış “Yahoo!” əməliyyat biznesini “Verizon” şirkətinə 4,83 milyard dollara satır. Sövdələşmə 2017-ci ilin birinci rübündə tam reallaşacaq.
“Yahoo!”nun məlumatına əsasən, əsas biznesini satdıqdan sonra şirkətin adı “Altaba” olacaq. “Altaba”da qalan aktivlərə “Alibaba Group” və “Yahoo Japan”nın payları daxildir.
Şirkətin yeni adının alternativ və Alibaba sözlərinin kombinasiyası olduğu bildirilir.
“Altaba”nın Direktorlar Şurasının yeni sədrinin Erik Brandt olacağı açıqlanıb. Erik Brandt Direktorlar Şurasına 2016-cı ildə daxil olub. Buna qədər o, “Broadcom Corporation”nun baş maliyyə direktoru postunu tutub.
