Qanunsuz ov: nazirlik nə tədbirlər görüb?
2016-cı ildə keçirilən reydlər zamanı qanunsuz ovla məşğul olan 213 vətəndaş saxlanıb, onlardan 193 ov tüfəngi, 632 patron götürülüb. Ekologiya və Təbii Sərvətlər Nazirliyinin məlumatına görə, Beyləqan, İmişli, Hacıqabul, Biləsuvar, Xızı, Xaçmaz və Quba rayonlarının ərazisində, “Ağgöl” Milli Parkında qadağan olunmuş alətlərlə (tələ, cələ, ilgək) qanunsuz ov edən Birləşmiş Ərəb Əmirliklərinin, Türkiyə, Pakistan, İraq və Suriyanın 16 vətəndaşı saxlanıb.
Hesabatda qeyd olunur ki, 200 nəfər inzibati qaydada 193 min 317 manat cərimələnib. Xarici vətəndaşların ov aləti kimi istifadə etdikləri quşlar götürülərək təbiətə buraxılıb, 29 fakt üzrə qanun pozucularının şəxsiyyətlərinin müəyyənləşdirilməsi üçün polis orqanlarına müraciət edilib. Qanunsuz ov edən xarici vətəndaşların ölkə ərazisindən çıxarılması (deportasiya) və gələcəkdə Azərbaycan Respublikasına buraxılmaması üçün Dövlət Miqrasiya Xidmətinə məktub göndərilib.
