Neftin qiyməti oynayır
Dünya birjalarında neftin qiyməti oynayır. AZƏRTAC-ın 9 yanvar məlumatına görə, Nyu-York birjasında “Layt” markalı neftin barreli 0,29 dollar ucuzlaşaraq 53,70 dollara, London birjasında “Brent” markalı neftin barrelinin qiyməti 0,26 dollar azalaraq 56,84 dollara düşüb.
Yanvarın 7-də isə Azərbaycan nefti “AzəriLayt”ın barreli 57,20 dollara satılıb. Bu, son 18 ayda qeydə alınan ən yüksək qiymət göstəricisi olub. “AzəriLayt” markalı neftin barreli London birjasında sonuncu dəfə 2015-ci il iyulun 24-də 57,71 dollara təklif edilib. Həmin vaxtdan Azərbaycan neftinin qiyməti 57,20 dollardan ucuz olub.
Novator.az xatırladır ki, iri neft ölkələrini birləşdirən OPEK hasilatı gündəlik 1,2 milyon barrel azaltmaq qərarı qəbul edib. Qeyri-OPEK ölkələri gündəlik hasilatı ümumilikdə 558 min barrel azaltmaq barədə razılığa gəliblər. Azərbaycan gündəlik hasilatı 35 min barrel azaltmağa razı olub. Qərarlar yanvarın 1-dən qüvvəyə minib.
Azərbaycanın 2017-ci il büdcəsində neftin qiyməti 40 dollar hesablanıb.
