Dünya futbol çempionatının formatı dəyişir
FİFA-nın dünya futbol çempionatı formatında dəyişiklik layihəsi üzə çıxıb. Novator.az bildirir ki, dünya çempionatının 48 milli komanda ilə keçirilməsi, yeniliyə 2026-cı ildən start verilməsi nəzərdə tutulur.
Hazırda dünya çempionatında 32 komanda təmsil olunur. Avropanın 13, Afrikanın 5, Asiyanın 4, Cənubi Amerikanın 4, Şimali və Mərkəzi Amerikanın 3 vəsiqəsi var. 2 vəsiqə Asiya, Cənubi Amerika, Okeaniya, Şimali və Mərkəzi Amerika təmsilçiləri arasında əlavə oyunlarda müəyyənləşir, 1 vəsiqə meydan sahibinə verilir.
Yeni plana görə, dünya çempionatının final mərhələsində 48 komanda hər birində 3 komanda olan 16 qrupa bölünəcək. Qruplarda ilk iki yeri tutan komandalar 1/16 finala yüksələcək.
Avropaya 16, Afrikaya 9, Asiyaya 8, Cənubi Amerikaya 6, Şimali və Mərkəzi Amerikaya 6, Okeaniyaya 1 yer verilməsi, qalan 2 vəsiqənin Afrika, Asiya, Cənubi Amerika, Şimali və Mərkəzi Amerika təmsilçiləri arasında əlavə oyunlarda müəyyənləşməsi nəzərdə tutulur.
