Baş Prokurorluq ilə yekun vurub
2016-cı ildə qeydə alınmış qəsdən adam öldürmə cinayətlərinin sayı əvvəlki illə müqayisədə 25 hadisə və açılmamış bu xarakterli cinayətlərin sayı 3 hadisə azalıb. Novator.az bildirir ki, Baş Prokurorluqda yanvarın 6-da keçirilmiş əməliyyat müşavirəsində belə məlumat verilib.
Rəsmi hesabata görə, ötən il Daxili İşlər Nazirliyi və Dövlət Təhlükəsizliyi Xidmətinin əməliyyat qurumları 178 qəsdən adam öldürmə cinayətlərindən 172 hadisəni, o cümlədən qeyri-aşkar şəraitdə törədilən 64 cinayəti isti izlərlə açıb və həmin cinayətlərin açılması 96,6 faiz (2015-ci ildə 95,5 faiz) təşkil edib.
Hesabat dövründə Korrupsiyaya Qarşı Mübarizə Baş İdarəsi dövlət və özəl sektorun 313 vəzifəli şəxsi barəsində 201 cinayət işinin istintaqını tamamlayaraq məhkəmələrə göndərib. Həmin işlər üzrə vurulmuş 202 milyon 430 min manat maddi ziyandan 31 milyon 752 min manatının ödənilməsi təmin edilib, 78 milyon 283 min manat məbləğində əmlakın üzərinə həbs qoyulub.
O cümlədən Rabitə və Yüksək Texnologiyalar Nazirliyinin vəzifəli şəxslərinin dövlət əmlakının mənimsənilməsi və digər qanunsuz əməllərinə dair cinayət işi üzrə istintaq yekunlaşdırılaraq 11 vəzifəli şəxs barəsində cinayət işi baxılması üçün məhkəməyə göndərilib. Vurulan ziyanın 18 milyon 778 min manatının ödənilməsi təmin edilib, 66 milyon 985 min manat məbləğində əmlakın üzərinə həbs qoyulub.
2016-cı ildə aparılan xidməti yoxlamalar nəticəsində 49 prokurorluq işçisi intizam məsuliyyətinə cəlb edilib, 9 nəfər prokurorluq orqanlarından xaric edilib.
