Rəsmi saytlar köhnə konstitusiya ilə işləyir
Ötən il sentyabrın 26-da keçirilmiş referendumda Azərbaycan Konstitusiyasına əlavə və dəyişikliklər edilib. Oktyabrın 12-də referendum aktı qüvvəyə minib və Azərbaycan Konstitusiyasının yeni variantı normativ hüquqi aktların vahid internet elektron bazasında dərc olunub. Konstitusiya Məhkəməsi də yenilənmiş ana qanunu rəsmi saytında yerləşdirib.
Novator.az bildirir ki, ana qanuna əlavə və dəyişikliklər üç aya yaxındır qüvvəyə minsə də, bir çox rəsmi sayt hələ Azərbaycan Konstitusiyasının yeni variantını dərc etməyib. Məsələn, dövlət başçısının rəsmi saytında, eləcə də parlament portalında ana qanunun köhnə variantları qalır. Ədliyyə Nazirliyinin saytında da eyni vəziyyət müşahidə olunur.
26 sentyabr 2016-cı il referendumunda ana qanunda prezident seçilmək, baş nazir təyin edilmək, hakim olmaq, deputat mandatı almaq, nazir postu tutmaq üçün yaş senzi aradan qaldırılıb, prezidentin səlahiyyət müddəti 5 ildən 7 ilə artıb, dövlət başçısı növbədənkənar prezident seçkisi elan etmək, parlamenti buraxmaq hüququ alıb.
Başqa bir əsas yenilik vitse-prezident postlarının təsisini nəzərdə tutur. Birinci vitse-prezidenti və vitse-prezidentləri Azərbaycan prezidenti vəzifəyə təyin və vəzifədən azad edir, növbədənkənar prezident seçkisi zamanı dövlət başçısının səlahiyyətləri birinci vitse-prezidentə keçir.
